قطر الحياة

قطر الحياة

يا قطر معصوب العنين

ماشى على قضبان

مكسّرها الزمن

بتتوه ساعات بين السكك

وساعات تكون

من غير دكك

وسألت.ليه القطر ده جواه زحام؟؟

قالوا إن فيه التذكرة

ملهاش تمن

إكمنه ماشى و ِسكّته

قضبان مكسّرها الزمن

فيك اللى ينزل ناس كتير بتوصّله

ولو عزيز غالى

ساعات بتحصّله

وناس ساعات تركب و تنزل

من سُكات

وعمرهم ما قالوا يوم

القطر فات

عدوا المحطات و السلام

كان السكوت

زى الكلام

وسألت تانى..

لمّا جيتوا دفعتوا كام؟؟

قالوا يا افندى التذكرة

ملهاش تمن

و القطر ماشى وسِكّته

قضبان مكسّرها الزمن

فيك اللى كرسيه جلد

مليان ريش نعام

فيك اللى واقف يغلى

من كُتر الزحام

فيك اللى راكب و السلام

من غير سبب

فيك اللى مرتاح

واللى ميّت م التعب

فيك اللى نايم فوق حرير

فيك اللى مش عارف ينام

لو حتى فوق لوح من خشب

فيك اللى بان

بره البيبان

ده الأولعوبان

يظهر فى ثانية و تلاقيه

فجأة احتجب

الخاين اللى لا عمره كان

على سر قلبك يؤتمن

والقطر ماشى و سِكّته

قضبان مكسّرها الزمن

اصرخ يا ناس

القطر ده رايح لـفـيـن؟؟؟

وإزاى قدرتوا تصبروا

جواه سنين

قام رد واحد قال

نصيبى وقسمتى

والتانى قال

مستنى تييجى محطتى

رد اللى فوق الكرسى

قال..دا دنيتى

ضحك اللى واقف من سنين

قال اصله قاعد من زمن

و التذكرة ملهاش تمن

والخاين إزاى يؤتمن

والقطر ماشى ولسه برضه سِكّته

قضبان مكسّرها الزمن

إمتى......

يصلّحها الزمن..؟؟؟

لماذا أتيتى..؟؟

لماذا أتيتى..؟؟

لماذا أتيتى.؟

جروحى نياماً فلا توقظيها

دروباً توارْت

فما عدتُ فيها

وما عدتى فيها

سنيناً عجوزاً..فلا تذكرينى

ولا تذكريها

لماذا أتيتى.؟

ترينى سواراً وعطراً يفوحْ

و وجهاً ذبولاً

وقد كان يوماً

ندياً صبوحْ

وقلباً جريحاً..ضنته الليالى

فأين الليالى.؟

و أين الجروح.؟

لماذا أتيتى.؟

تظنين أنكى تحيى بدونى

وأنى مريضٌ

بداء الشجونِِِِِِِِِِِِِِِِ

فتلك أمانىّ عندكى أنتى

و وهماً خبيثاً

وبعض الظنونِِِِِِِِِِِِ

لماذا أتيتى.؟

أأمنحكى سراً قوياً أكيدا

لقد صرتُ بعدكى

خلقاً جديدا

فقد صرتُ صلداً كصخرِ الجبالِ

شديدُ الشموخِ

أبياً عنيدا

وما كان بينى و بينكى ولى

وما أبقى إلا سؤالاً وحيدا

لماذا أتيتى..؟؟

خدت العلاوة.؟؟

ســألـتـه.خـدت العــــلاوة؟قــاللى طبـعـا لأ

طول عمرى وانا عند حكومتك مالياش حق

شـغـال فواعلى باعبى الرمـل فى الغـلقـان

وحياتى ماشـية إنما ماشـية يـدوب بالـزق

ســألـته.خـدت العـــلاوة؟قـاللى انا نجــار

أنشر فى لوح الخشب و ادق ع المســمار

معـايـا دبلـوم تجــارة من ســنة تســعـين

وتجــارة زى النجــارة وكــله بالمنشــار

ســألــته.خــدت العــلاوة؟قـاللى انا حداد

أبرم حـديــد البـنا لمـا الفــران تنـقــاد

وبقالى قول سنتين لا حديد و لا دياولو

وسألت قالوا البلد باعها الولد فى مزاد

ســألـتـه.خــدت العــلاوة؟قاللى انا بقال

من يوم ما كانت الجـبنة بتـلاتـة ريــال

اما النـهاردة بقـت بتزيد جـنيه فى اليوم

ولا حتى ستـين عـلاوة يغيرولنـا الحال

ســألـتـه.خــدت العــلاوة؟قاللى انا فلاح

فى عز برد الشــتا شغــال ومش برتاح

باجيب كيماوى و تقاوى فى السنة نوبتين

فى الأرض ضهرى إنحنى.إمتى الحمول تنزاح

ســألـتـه.خــدت العــلاوة؟قاللى انا تلمـيذ

قـالـولنا فى المدرسة إن العـلام ده لـذيـذ

وأدينى باكتب و باقــرا وتبقى آخرتــها

شهادات و متعلقة ع الحيطة فى البراويز

سألته.خدت العلاوة؟قاللى روح يا عبيط

بقى يبقى جنبى البـحر و ابص للتـنـقـيط

شغــال موظف جمــارك من سـنة ألـفـين

واعرف اجيب الجنيه لو كان مع العفريت

سـألـتـه.خــدت العــلاوة؟قاللى روح إمشى

ســألـتـه.إيه شغلـتـك؟قاللى مـاتسـألـشى

لقـيـت النـسـر فـوق كـتـفـه بـيـظغـرلى

انا خفت ليعضنى او أروح وما ارجعشى

سـألـتـه.خــدت العــلاوة؟قال عــلاوة إيه؟

أنا يا ابنى ولا تفرق معايا علاوة ألف جنيه

مأمور ضرايب بقى..يجعل كلامنا خـفـيـف

حضراتكو طبعا بقى عارفين انا اقصد إيه

سـألـتـه.خــدت العــلاوة؟قاللى مش عايز

قول للى باعتك كمان.شعبك عبيط؟؟جايز

بس المـهـم إنهـم مش كلـهـم مسـاطـيـل

ح تبيع علـيهـم هـــوا متعبى فى أزايــز

قــالــوا زمان الـنـزاهة تكون على قدك

عـايـز تبقـشــش.تبقـشــش بس من يدك

وادينى قلت اللى عندى ياللى مش سامع

وإن كنت سامع يا ريت تقوللى إيه ردك

و كان حلما ؟؟؟

و كان حلما

ـــــــــــــــــــ

نعـم لابـــــــد أن نخطـــــــئ

فإنـا لســـــــنا رهـبانـــــــــا

فـعــــــــــذرا أننـا بشـــــــرا

وطــــــول الدهـــر أنســـــانا

بأنـا كنــــــــا عشـــــــــاقــا

و أصــــحابـــــا وخـــــلانــا

فقد أخلصــــــــــت فى حــب

لقـلــــــــب كان خــــوانـــــا

فـــلا آســـــفا ولا ندمــــــــا

فمــــا قد كـــــان قد كـــــــان

ومن أســكنتـــها قـــــــــلبى

بــــدت للعيــن شيطــانــــــا

وقـــــد كـــانت لى تــــوراة

وإنجــــــيــلا وقـــــــــرآنـا

وكـــــم أثريتــــها شــــعرا

بقـــــــافـية وأوزانـــــــــا

وكـــــــم أهديتــها حلــــما

يجـــــــوب الكـون فرحانا

وإن كــــانت تحدثنــــــى

سمـــــعت الكـلم ألحانـــا

وإن نظـــرت فيــا ويــلى

بخــمر العيــن سكرانـــــا

مـــرارا قلــــت أهــواكـى

وكــــان الــرد حرمـــانــا

ســــألت....ألــم تحبينى؟

أكــــل البشـــــر خوانـــا؟

أكـــــــنا بعشــقنا نلـــهـو

ووقــــت الجد قد حــــان؟

فمـــا قــالت ولا حـــــرف

فثـــــار القــــلب غضـبانا

وهـــاهى كفــــى تــــرتفع

تفـــجر غيـــظى بركـانـــا

وتـــهوى فــوق خديــــها

تـــزيد الحقــــد إمـعانــــا

فلــــم تهــوى ولم تصــفع

ومــا ألفيــت وجــــهانـــا

وحالــــــت بيننا حجبـــــا

وأســــوارا و وديـــــانــا

إذا بــى غائــــــبا عقـــلى

وصــــوتا فيه كــــتمانــــا

رويـــــــدا صار يتضــــح

يقــــول.غـــدوت كسـلانا

إذا بـــى أمــى توقظنــــى

أحـــدق فيها دهشــانــــــا

وأضرب كفـــى فى كفـــى

أحـــــقا...كنت نعســـانا؟؟

مولد يا دنيا

مولد يا دنيا

___________

مولد يا دنيا وناس ياما ----------تقولش قيامة
وسالمة يابا ويا سلامة ---------والناس ماشيين

اوام اوام إتلموا يا ناس ---------من كل اجناس
الليلة مولد ابوالعباس -----------كلنا رايحيين

الست أحلام و بناتها -----------واخدة حماتها
ورايحة هيه وشلتها----------- قول ييجى ستين

واخدين معاهم فتحية------------- بنت بهية
أصل إبنها وجوزها وهيه-------- زى المجانين

عليها آل جنى سودانى ----------وبتقول يانى
دا كلام سمعته انا بودانى -------واحلف به يمين

والحاج حمدى والاضيشه --------نافش ريشه
وفارشلى مرتبته و خيشه --------للمنجعصين

وإبنه اللى جابه من التالتة-------- اهو جه فالتة
واهو مرمى جنبه فوق الشلتة------ أهبل وتخين

والحاج سعد معاه الشنطة -------وجاى من طنطا
ما ينوبه غير شيلة وحاطة --------زى التانيين

والواد حجازى إبن العمدة --------وامه اللمضة
جايبة القفص بزيارة جامدة -------من بط سمين

وكل واحد كان منحوس -------مش لاقى فلوس
جاى ف الضريح عمال بيبوس ----ومدد يا حسين

غير الدسوقى وابو الدردار------- والله ما هزار
يوم ف السنة الكل بيتزار-------- م البنى آدمين

والسيد البدوى يا سيدنا--------- وده يوم عيدنا
نرجع بحمصنا ف إيدنا ----------وحلاوة وتين

ناس الموالد شغلتها------------ وكارها وبيتها
تقلب الناس ف ساعتها-------- والناس مجانين

بقى كل راجل وولية-------------- عنده رزية
يروح يزور الأوليا------------ ومعاه التموين

الناس يا ناس مخها ضلم----------- كله مبلم
والأمى زى المتعلم------------ بقوا متساويين

الأوليا طبعا ناسنا------------ تاج فوق راسنا
بس الإيمان برضه أساسنا----- وبنعيش بالدين

لو حاجة عايز تطلبها --------- يبقى إحسبها
واطلبها م اللى بيوهبها---------- للبنى آدمين

ولو ف يوم كنت ف زنقة------- وجاتلك خنقة
(إفتح أوام مصحف تلقى-------- (يوسف)و(يس

الآوله ح تزيل كربك -------------يرتاح قلبك
والتانية ح تحقق طلبك--------- لو كان ملايين

إرجع لربك ح يعيينك -----------وانصر دينك
وقبل ما تخطى يمينك -----------شوف رايح فين

عتاب؟؟؟

عتاب..؟

ياللى إنت جاى بتقوللى قريت البوست يا عم

هوه البعــيد يعنى يا اخويا ده ما عندوش دم

علشان يجرح كده فى الناس وف أشعـــارهم

طب جاى بتعلق ليه ف بلوجى وليه مهتم ؟

أصل اللى بيسرق مجهود غيره ده يبقى حمار

بقــى زى الكــلب اللـى مرابـط عنـد الجــــزار

مســــتنى يحــن ويرمــى له حتـــة عضـــمة

آهى عضـــمة لكن بالنســبة له زى الكافيـــار

ممكن أوقــات بتشــوف كلمة قلمى راصـدها

لكن مش ممكن يعنى باكون برضه قاصدها

واللى بيقــرا دايمــا مش زى اللــى بيكتــب

مش كل ما هتشوف بقى كلمة تييجى صايدها

ده توارد فكر وصورة ومعنى..دى منظومة

وانا كده لله راح اقــولك بقى على معـلومـة

انا عازرك طبعا.....بس أقولك على حـاجة

(الذمة..خلاص..حصلت على لقب...(المرحومة

حبيتى ؟؟؟؟

حبيبتى

يا مصر ياللى التاريخ ســطر علـى جبيـنـك
العــمـر يخـلــص ولا يخـلــص مـحـبيــنـك
من بص ف عنيكى بصة تسحريه على طول
يتــمـنى لو يبـقى زرعــة نابـتــة من طـيـنـك

سألونى يعنى إيه مصـر؟ومصـر إيه يعـنى
أنا قـلت حضـن ودفــا و صــدر شبعنى
وإيدين بتاخد عزا و زغروطة يوم فرحى
ولما اقـــول الآه مـيـن غـيرها يســمعـنى

أنا مصر عندى مش ملوك وقصور وسجادة
دى مصر شنجى وبرنجـى وكنـجى وبيــادة
وفانوس ف إيد طفلة أول ليلة من رمضـان
دقــت عـلى البـاب قـالـتــلى . إدينـا العــادة

أنا مصرعندى مش تراب ولا أهرامات واقفين
دى مصر دى محمد وزيزو وإبراهيم وحسين
وعــم حـنـا اللى قـاعــد يشــرب القـهــوة
ويقول ما تييجى تتغلبلك عشرة و الا إتنين

مصر اما ييجى الشــتا لحـاف يغطيــنى
وف حمتى كمـادات باردة على جبيــنى
و اسم الله يا ابنى لما اقع و إيدين تقومنى
وجــرس وجنبه الآدان للخــير يناديــنى

دى مصر ريحة العنب ونخيل بلح أبريم
وصلاح وبيـرم وعبـده ونجـم ويا حليــم
وثــومة والنقــشـبـنـدى لو يقول مولاى
يحسسك أد إيه ربك غفور و رحيم

ياللى إنت ناكر لخيرها روح وسيبهالنا
دى العيشة لو جوه عشة فى مصر تحلالنا
بلـدنا.بنحـبها والحــب ما يعــبنــاش
لكن يعيبنا السكوت على وضعنا وحالنا

ياللى إنت راكب حصان واخد وراك إتنين
واخد حبيبــتى معـاك.طيب واخـدها لفين؟؟
ما اقدرش اشوفك و اسيبك تمشى على كيفك
ما اقدرش اكون فى الدنيا دى عايش كده بوشين

دى حبـيـبـتى لـو تبتسـم الدنيـا تـبقــى ورود
وانا حبـى ليها ما تقــدر يـوم تحــده حـدود
حافضـل محـوط عليـها بقلـبى وجنـاحــى
ويا تبقى حرة يا فى ترابها ياكلــنى الدود